ՋԱՎԱԽՔ

Ջավախքի ծնողազուրկ երեխաներն օգնություն ստացան

Ախալքալաք. 27. Օգոստոսի. Օգոստոսի 25-ին և 26-ին ջավախքցի 115 ծնողազուրկ երեխաներ ֆինանսական օգնություն ստացան: Ջավախքի ընդհանուր առաջնորդական փոխանորդությունը արդեն երեք տարի է կազմակերպում է այս ծրագիրը, որը կոչվում է ,,Հույս Ջավախքի երեխաներին'': Այն իրականացվում է ԱՄՆ-ի Նյու-Յորք քաղաքի հայ բարերարների ֆինանսական աջակցությամբ:

 Յուրաքանչյուր երեխայի համար նախատեսված է 100 ԱՄՆ դոլար: Օգնություն կարող են ստանալ մինչև 18 տարեկան ծնողազուրկ երեխաները, այսինքն` մինչև չափահաս դառնալը: Իսկ 18 տարին լրանալուց հետո երեխան ցուցակից հանվում է և նրան փոխարինում է մեկ այլ ծնողազուրկ երեխա: Եթե ընտանիքում մեկից ավելի երեխաներ կան, նույնչափ գումար հատկացվում է նաև նրանց: Ֆինանսական օգնությունը հատկացվում է երկկողմանի և միակողմանի երեխաներին` կախված նրանց սոցիալական վիճակից:

 Ծրագիրը գործում է արդեն երեք տարի: Առաջին տարին ընդգրկված է եղել ընդամենը 28 երեխա: Տարեց-տարի երեխաների թիվն ավելացել է: Նախորդ անգամ` այս տարվա մայիսին, օգնությունը բաժանվել է կրկին 115 երեխաների: Ֆինանսական աջակցություն ստացել են նաև 11 երեխաներ Նինոծմինդայի շրջանից:

<<Պատահական չէ, որ հենց այս օրերին հասավ օգնությունը: Նախադպրոցական սեզոն է, և երեխաները փողի կարիք ունեն` հագուստի, դպրոցական պիտույքների համար, այս գումարը նրանց շատ կօգնի>>,-ասաց Ջավախքի Ընդհանուր առաջնորդական փոխանորդության գործերի կառավարիչ Ռուբեն Սեկոյանը:

 Ամեն մի երեխայի համար կա մի հովանավոր, ով այդ երեխայի համար տարեկան հատկացնում է 200 ամերիկյան դոլար, 100-ը տարվա սկզբին, մյուս 100-ն էլ` տարվա վերջին: Երեխաներն էլ իրենց հերթին նկարներ և շնորհակալական նամակներ են ուղարկում իրենց բարերարներին և նշում, թե այդ գումարը որտեղ և ինչի վրա են ծախսելու: Ռուբեն Սեկոյանն ասաց, որ բարերարները հետաքրքրվում են, թե իրենց ուղարկած գումարը ինչպես են ծախսում փոքրիկները:

 <<Հովանավորների հիմնական մասը ամերիկահայեր են, չնայած կան նաև այլազգիներ, որոնք նույնիսկ Ջավախքում չեն եղել, ուղղակի նրանք հավատում են մեր հաղորդած ինֆորմացիային, երեխաների ուղարկած նկարներին ու նամակներին, այդպես տեղեկացել են Ջավախքի սոցիալական ծանր վիճակին և որոշել են օգնել>>-պարզաբանեց Ջավախքի Ընդհանուր առաջնորդական փոխանորդ Հայր Բաբգէն Սալբիյանը:

Հայր Բաբգէնը նաև ասաց, որ այս ծրագիրը պիտի շարունակական լինի, արդեն ներգրավված են Ախալքալաքի և Նինոծմինդայի շրջանները, կընդգրկվեն նաև Ախալցխայի և Ծալկայի շրջանները:

Մեզ պետք է իր գործում հմուտ աշխատող 

Ախալքալաք. 24. Օգոստոսի.  Նոր ուսումնական տարվանից` սեպտեմբերի 17-ից, Ախալքալաքի շրջանի միայն երեք դպրոցներում կղեկավարեն նոր տնօրենները: Մեկը Չունչխա գյուղի` հոգաբարձուների խորհրդի ընտրած տնօրենն է, իսկ Վլադիմիր Մայակովսկու անվան թիվ 2 ռուսական և Իլյա Ճավճավաձեի անվան թիվ 3 վրացական դպրոցները կղեկավարեն Վրաստանի կրթության նախարարության կողմից նշանակված նոր տնօրենները:

 Թիվ 2 ռուսական դպրոցում տնօրեն է նշանակվել Կարինե Նահատակյանը, ով տնօրինում էր Ախալքալաքի նախկին ռուսական ռազմակայանի դպրոցում, իսկ թիվ 3 վրացական դպրոցում` Թբիլիսիում մանկավարժական փորձ ձեռք բերած, Ախալքալաքի շրջանի Չունչխա գյուղի վրացական և Դիլիսկա գյուղի հայկական դպրոցներում տնօրեն աշխատած Լեյլա Ջինճառաուլին, ով մասնակցել է դպրոցի տնօրենների համար Թբիլիսիում ս.թ. հունվարին կայացած թեստավորմանը և հավաքել համապատասխան միավորներ:

 Կարինե Նահատակյանի հավաստմամբ, ինքը նույնպես մասնակցելով տնօրենների համար անցկացված թեստավորմանը, հավաքել է բարձր միավորներ: Ջավախք-ինֆոյի այն հարցին, թե այդ դեպքում ինչու իր անունը չէր գրանցված թեստավորումը հաղթահարած տնօրենի անվանացանկում, տիկին Կարինեն պատասխանեց, որ ինքն անցել է բողոքարկելուց հետո, իսկ բողոքարկել է, քանի որ մնացածների համեմատ հավաքել է բարձր միավորներ և գնահատող հանձնաժողովի ներկայացուցիչների կողմից իր պատասխանները հաշվի առնվել են:

 Մինչդեռ թեսթվորմանը մասնակցած ռուսական դպրոցի մեկ այլ ուսուցչի` Մարինա Չոմարյանի խոսքերով, Կարինե Նահատակյանի նշանակումը տնօրենի պաշտոնում, անարդար  կերպով է եղել, քանի որ  << Կ.Նահատակյանն էլ չի անցել թեստավորումը և չի կարողացել հաղթահարել վրացերեն հարցազրույցը: Բայց նրան նշանակեցին, որովհետև Վրաստանի խորհրդարանի պատգամավոր Հենզել Մկոյանի կինն է>>: 

Ախալքալաքի շրջանի կրթական ռեսուրս կենտրոնի պետ Նարցիս Կարապետյանն առաջնային խնդիր համարեց ոչ թե վրացերենի իմացությունը, այլ տնօրենի` կրթության որակի բարձրացմանը նպաստող գործունեությունը. <<Նոր տնօրենները, ժամանակավորապես ստանձնել են դպրոց ղեկավարելու պարտականությունը, բայց եթե իրենց չարդարացնեն, նրանց էլ կփոխարինեն նորերը` ովքեր դպրոցի տնօրենների ընտրության` հոկտեմբերին կայանալիք երկրորդ փուլի ժամանակ կհավաքեն  համապատասխան միավորներ, իսկ  հին տնօրենները մի քիչ դժվարությամբ զիջեցին իրենց <<աթոռը>>: Պարզ է, դժվար է, երկար ժամանակ աշխատել են, սակայն մեզ պետք է  իր գործում հմուտ աշխատող>>:

 Բայց եթե առաջնայինը վրացերենի իմացությունը չէ, այլ կազմակերպչական և այլ հմտությունները, ապա ինչու են բոլոր դպրոցների տնօրեններին հանել իրենց պաշտոններից:

 Պրն.Կարապետյանը այդ նշանակումը բացատրեց Վրաստանի Կրթության նախարարության իրավասությամբ. <<Կրթության նախարարությունը իրավունք ունի նշանակել իր նախընտրած ներկայացուցչին>>:

 Դպրոցի աշխատակիցների հավաստմամբ, Կարինե Նահատակյանի` տնօրենի պարտականությունների կատարման այս մի քանի օրվա ընթացքում  արդեն փոփոխություն կա դեպի լավը: <<Երկու օրվա ընթացքում արդեն կարգ ու կանոն է հաստատել դպրոցում, թե' մաքրության, թե' աշխատակազմի աշխուժության, և առհասարակ, ցանկացած հարցում: Անձնական գործերի փասթաթղթերի թղթապանակները, որոնք մեզ մոտ խորհրդային տարիներից եղածներն էին, փոխարինել  է նորաձև թղթապանակներով: Իսկ ամենագլխավորն այն է, որ ինքը շատ պատրաստված է իր գործի համար>>,- նշեց փոխտնօրեն Ռիմա Գրիգորյանը:

 Հոգաբարձուների խորհրդի նախագահ Մելիքիձե Սուսաննայի խոսքերով, եթե կրթության նախարարության հրամանով է նշանակված, ուրեմն, համապատասխան մասնագետ է. <<Հոգաբարձուների խորհուրդը չկարողացավ տնօրեն ընտրել, այդ պատճառով էլ Վրաստանի կրթության նախարար Ա. Լոմայան իր հրամանով նշանակեց Կարինե Նահատակյանին>>:

 Մեր այն հարցին, թե ինչ կարգավիճակով պետք է շարունակի իր աշխատանքը  դպրոցի նախկին տնօրեն Իզաբելա Ղազարյանը, Կ. Նահատակյանը նշեց, որ կախված է իր հետագա գործունեությունից. <<Ես չեմ ուզում արատավորել ոչ մեկին, բայց եթե նախկին ձևով շարունակի իր աշխատանքը, այլևս չի աշխատի: Դպրոցում չկա կանոնագիրք, բացակայում են այբենական գրքեր, աշխատողների կատարողական թերթիկներ: Այստեղ ոչ ոք տեղյակ չէ իր իրավունքների և պարտականությունների մասին>>:

 Հիշեցնենք, որ Ջավախքում ոչ մի հայկական դպրոց դեռևս տնօրեն չունի: Ջավախքի մնացած դպրոցների տնօրենների հարցը կլուծվի հոկտեմբերին կայանալիք թեստավորումից հետո:

<<Երիտասարդական ռադիոյի>> տարեդարձին նվիրված միջոցառումն ավարտվեց հայկական քոչարիով

 Ախալքալաք. 22. Օգոստոսի.  Ախալքալաքի կենտրոնական այգում երեկ անցկացվեց Ջավախքի <<Երիտասարդական ռադիոյի>>  կայացման հինգ ամյակին նվիրված միջոցառում:

 Ողջունելով ներկաներին, ռադիոյի աշխատակիցները մատուցեցին ռադիոյի նախապատմությունը, ձայնագրություններ ինչպես ուղիղ եթերներից, այնպես էլ եթերից դուրս, նաև բեմական ներկայացումներ:

 Միջոցառման ընթացքում ներկաներն ստացան մրցանակներ` պատասխանելով իրենց համար պատրաստված հարցերին:

 <<Երիտասարդական ռադիոյի>> հաղորդավարների և հաղորդումների համար հանդիսատեսի ծափահարություններով որոշվեցին  <<Ամենաաշխույժ>>, <<Ամենաարագախոս>>, <<Ամենաեթերային>> հաղորդավար, <<Ամենագեղեցիկ ձայն>>, <<Ամենասիրված>> և <<Ամենառիթմիկ>> հաղորդում անվանակարգերը:

 <<Ամենաաշխույժ>> և <<Ամենաարագախոս>> ծրագրավար ճանաչվեց <<Բարի լույս, Ջավախք>>-ի հաղորդավար Քրիստին, ում վարած <<Ցիպոչկա>> հաղորդումն էլ ճանաչվեց <<Ամենասիրվածը>>: <<Ամենաեթերային հաղորդավարը>> անվանակարգում հաղթեց <<Իրիկնային ղողանջ>>-ի վարող Հռիփսիմեն, <<Ամենագեղեցիկ ձայնը>>` <<Խառնաշփոթ>> ծրագրի հաղորդավարներից Անահիտը, իսկ  <<Ամենառիթմիկ հաղորդումը>> անվանակարգում` <<Խառնաշփոթը:  Հանդիսատեսի համար ռադիոյի անձնակազմի կողմից անակնկալ մատուցվեց, երբ միջոցառման ավարտին բեմ բարձրացվեց ամենասպասված հյուրը` տորթը:

 Միջոցառումն ավարտվեց ներկաների համար կազմակերպված դիսկոտեկով: Իսկ երիտասարդների կողմից հայրենասիրական երաժշտության տակ բեմի շուրջը բռնած քոչարին, որի ժամանակ պարզվեց հայկական եռագույնը, ոգևորեց բոլոր ներկաներին:

 Հանդիսության ավարտին եղավ փոքրիկ հրավառություն:

 Նշենք, որ Ջավախքի <<>Երիտասարդական ռադիոն>> ստեղծվել է 2002 թվականին` Ջավախքի երիտասարդական մարզամշակութային միության կողմից:

Plus...